Diskominfo>>Sektor pertanian arupi satunggaling prioritas ambangun Kabupaten Bantul, ngenget agengipun peluang ugi potensi ingkang taksih saged dipunrembaka lan dipundayagunakaken kangge indhak-indhakan kasejahteran masyarakat ugi ngrembakaning perekonomian daerah. Bab kasebut dipunaturaken Bupati Bantul, Drs. H. Suharsono ing acara kridhaning panen pantun ingkang wonten ing Bulak Kelompok Sedyo Makmur, Polaman, Argorejo. Slasa (11/6).
Bupati Bantul nyaosaken apresiasi dhateng sedaya kadang tani Sedyo Makmur saking dedikasi ing kupiyaning kasejahtreran.
"Menika wujud gregeting makarya kadang tani sedyo makmur ingkang kedah kita sedaya reksa," tembung Bupati.
Bupati Bantul mertelakaken, nalika pertanian dados sektor andalan utamaning kridha pamungon tamtu kemawon dipunbetahaken teknologi ingkang tepat gina. Inovasi teknologi pertanian arupi sawijing kewajiban kangge mecut indhak-indhakan produksi, produktivitas saha kualitas produk pertanian ingkang kagungan daya saing.
"Dhateng kelompok tani sedyo makmur kangge ngrembakakaken kawruhipun ugi tansah mangangge pupuk organik, jerami ing sabin, kridhaning pengendalian hama, varietas unggul ingkang enggal," atur Bupati.
Sawetawis Camat Sedayu, Drs. Fauzan Muariffin mewahi, kagiyatan panen raya menika kasilipun sae sanget. Mliginipun ing bulak polaman tirtanipun kathah sanget dados kangge paneneman pantun saged dipunwontenaken kanthi sae.
"Kagiyatan pertanian ing Sedayu kathah sanget ingkang dipunsengkuyung Dinas Pertanian, Pangan, Kelautan lan Perikanan Kabupaten Bantul kamangka kasilipun ugi sae sanget," pajaripun.
