Kanthi launching dukcapil smart ing wiwiting warsa punika, masyarakat Bantul langkung gampil ngurus dokumen kependudukan, kados KTP Elektronik (e-KTP) lan akta lair kanthi aplikasi adhedhasar android ingkang saged dipununduh saking google playstore.
Bab kasebut dipunaturaken dening pangarsa Dinas Kependudukan lan Cathetan Sipil Kabupaten Bantul Bambang Purwadi, SH, MH nalika mangsuli pitakenan pranatacara ing acara siaran taman paseban kanthi tema "Layanan Adminduk Wonten Era Digital" ingkang dipunsiaraken langsung wonten stasiun TVRI Yogyakarta, Slasa (17/9). Narasumber setunggalipun ing acara kasebut inggih punika sekretaris dhaerah Kabupaten Bantul Drs. Helmi Jamharis, MM.
Ing kalodhangan kasebut Bambang Purwadi njlentrehaken menawi aplikasi Dukcapil Smart ingkang saged dipundownload mawi googleplay punika kangge nggampilaken masyarakat Bantul ngurus dokumen kependudukan, kados e-KTP, kartu identitas anak (KIA), akta lair, lan sanesipun.
Bambang ngendika Dinas Dukcapil sadangunipun sekawan warsa punika sampun nindakaken 14 lampahan ageng. Saking 14 lampahan ageng kasebut, setunggal ing antawisipun ingkang paling enggal inggih punika aplikasi adminduk adhedhasar android kanthi nami aplikasi Dukcapil Smart.
Kados ingkang dipuntuladhani Bambang, tutorial panyuwunan akta lair namung kanthi mbikak Dukcapil Smart ing menu akta lair, teras pilih icon akta lair, lajeng pejet tombol 'tambahan'. Lajeng jangkepi sedaya data lan foto ingkang dipunbetahaken lajeng pencet tombol kintun. Mila muncul status akta lair.
Menawi akta lair sampun katampi, enggal konfirmasi kanthi cara menekan tombol 'konfirmasi', mila status lajeng ewah lan menawi badhe ngintunaken akta lair ingkang mawi HP panyuwun, lan kedah klik konfirmasi menawi akta lair kasebut sampun dipuntampi.
Kejawi punika, kanthi tapak asta elektronik kangge kartu kulawarga lan akta lair kanthi barkode ingkang sampun wonten sertifikasi mila aman saking pembobolan oknum ingkang mboten tanggel jawab. Wekdal punika sedaya warga saking lair dumugi seda kedah kagungan dokumentasi kependudukan.
Saking 938 ewu penduduk Bantul, ingkang dereng kagungan data asminduk saged dipunmangertosi mawi data asminduk By Name lan alamat jangkep. "Kanthi Nomer Induk Kependudukan (NIKk) sedaya pelayanan saged dipunlayani kadosta BPJS, SIM, bantuan sekolah, badhe mlebet kuliah, lan sanes sanesipun," katranganipun Bambang.
Dinas Dukcapil ugi paring pelayanan khusus kangge warga ingkang mboten saged rawuh dhateng Dinas kados disabilitas, tiyang gangguan jiwa, lan sanesipun. Ing saben Jemuwah, mobil Disdukcapil methuk bal kangge nglayani.
Kejawi punika wonten ugi PAGODA inggih punika perekaman e-KTP plus golongan rah inggih punika inovasi kasil kerjasama kaliyan PMI Kabupaten Bantul. Kangge nglampahi tes golongan rah saged dipunladosi saben dinten Senin-Kamis, tabuh 09.00 WIB -12.00 WIB mapan wonten ing Disdukcapil.
Nalika Sekda Kabupaten Bantul njlentrehaken menawi ayahan pamarintah wonten mapinten-pinten, antawisipun nyurung masyarakat kangge majeng, pemberdayaan saha paring pelayanan kanthi sae. "Tansaya canggihipun pelayanan adhedhasar teknologi informasi (TI), mila pamarintah ugi nyurung wontenipun ewah-ewahan kados Dinas Kominfo Kabupaten Bantul ingkang tansah saged njembatani antawis OPD pelayanan kaliyan masyarakat supados masyarakat saged dpunladosi kanthi sae lan pamarintah saged paring pelayanan langkung sae ugi," tembung Pak Sekda.
Kangge nyengkuyung pelayan ingkang langkung sae punika, miturut Sekda Bantul, kula panjenengan nyengkuyung ugi dhateng para ASN-ipun supados dados ASN ingkang smart, supados saged ngladosi birokrasi ingkang enggal, leres lan maremaken. Ciri smart ASN antawisipun kagungan integritas inggil, disiplin, nguwaosi TI supados saged nglayani langkung sae lan mboten kantun perkembangan TI kasebut.
"Kanthi kamajengan TI sedaya data masyarakat sampun kasimpen wonten database ingkang sampun koneksi kaliyan sedaya aplikasi layanan ingkang leres lan enggal wonten disdukcapil ingkang wekdal punika sanes bab ingkang mustahil, nanging setunggaling realita," aturipun Sekda.
Ing acara kasebut dipunsengkuyung ugi kanthi pentas kesenian keroncong saking dusun Santen Wijirejo Pandak lan penampilan produk UMKM saking aneka kerajinan box vinyl Galih Kraf pangageng Hestuni Kristyari.
