Diskominfo - Kangge nindak-lajengaken Peraturan Menteri Komunikasi lan Informatika No. 10 warsa 2016 bab layanan Nomer Panggilan Darurat 112, Pamarintah Kabupaten Bantu mawi Dinas Komunikasi lan Informatika ngawontenaken pelatihan kangge operator Nomer Panggilan Darurat (NPD) 112. Rawuh ugi ing pelatihan ingkang dipungelar dangunipun kalih dinten saking tanggal 23 - 24 September 2019 inggih punika perwakilan saking badan penanggulangan bencana daerah (BPBD), Polres Bantul, Dinas Sosial, Dinas Kesarasan, Satuan Polisi Pamong Praja lan Seksi Pengamanan Persandian Diskominfo.
Pelatihan katindakaken wonten Gedung Pertemuan Sayap Barat Komplek Parasamya kanthi ndugikaken trainer saking PT. 168 Solusindo lan PT. Jasnita Telekomindo, miturut Sekretaris Dinas Kominfo Dian Mutiara Rahmawati, S.H., M.M. Salebeting laporanipun, program NDP 112 punika inisiatif Kemenkominfo kangge nyedhiyakaken call center gratis. "Kejawi punika fungsi saking nomer tunggal layanan darurat punika kangge nglayani masyarakat salebeting kawontenan darurat kados bencana, kabesmen, pertolongan medis, keamanan lan kawontenan darurat sanesipun," aturipun Dian.
Langkung lajeng piyambakipun ngendika, tujuwan saking call center 112 inggih punika: (1). Nampi lan ngintunaken pertolongan salebeting kawontenan darurat kanthi jaringan telekomunikasi, (2). Ngempalaken nomer panggilan darurat kangge nggampilaken masyarakat salebeting penanggulangan kawontenan darurat, (3). Layanan nomer tunggal panggilan darurat dipunlampahaken kangge penanganan kawontenan darurat ingkang ngliputi kabesmen, keresahan, kacilakan, bencana alam, lan kawontenan darurat sanesipun ingkang dipuntetepaken dening pamarintah dhaerah, lan (4). Nggampilaken koordinasi antar instansi terkait.
